Theihṭha Le Zirṭha Hlan Pupa Ṭong ( Ṭongfim)

Theihṭha Le Zirṭha Hlan Pupa Ṭong ( Ṭongfim)

 Theihṭha Le Zirṭha Hlan Pupa Ṭong ( Ṭongfim)

1.)   Ral i hnu i Sial Kiptlo = Ral rehhnu i hrosuang ciamco, mi tihhrut. ( ṭong elawk, le thubuai ṭheh hnuih ngam huai ciamco. ) 

2.) Telve kamcat = Mithu relmi ah telve tum ring2 ih relding thei ngai2 cuang lo.

3.) Kaaṭha le ram buber= Relmi cu tha thei zet nan ziang si cuang lo.
4.) Kaa le beelte = Tlok zuatzo nan tuahmi ngai nei thei dah lo.

5.) Bualkhaw tlawn le Faar lakceem = Tuahmi pakhat, ṭheh mi pahnih.

6.) Mai ha le darkhuang = Mai hrang lawng tuah ding i sawm. 

7.) Maihrang cangai khorh = Mi hrang zawnruat lemlo, mai hrang lawng tuah.

8.) Kei i fa neih le pulh tlung = thil ti thei sun tuah rero lai ah vansiat ton.

9.) Laiking puanpi tah tum bang = Tumtahmi tuahsuak thei ti ni um dah lo ih rel ringring.

10.) Mi-aa thuforh le naamhrut tat = Mi-aa thuforh cu santlailo, bang lak men.

11.) Mi tawh duh i thuhnu sal = mi thawi tawhawk duh cun a liamcia dunglam thu rel sal.

12.) Nunlai singlawn, thih ah kungtlung = Duh-awzet na'n nu le pa sungkhat unau ruang i co aw thei lo.

13.) Nu le pai thusim sanglo savom sumdeng hmu = Nu le pai thusim sanglo cu vansiat tonnak.

14.) Nu le pai thusim sanglo zubui lamtlaang ril. (13. nak thawn a bang aw.)

15.) Pampheh ṭhalo, Pharpheh ṭhalo = Mai sinak taktak cu pheh a theih ngaingai lo.

16.) Ṭhahnem ngaiih, paamsin tong = ṭhahnem ngaiin zuam rero nan ngahlo sinsin.

17.) Sapi in a neh thihpi, Pacang ṭha in a ṭong thihpi = Pacang ṭha cu mai ṭong vek le thukam vekih nung taktak ding.

18.) A nu nehlo Hlei Tawl vuak = Mi pakhat thawi buainak neiih nehlo ruangih nehmi midang parah kut thlak.

Mai’ duhmi thawi’ kaihra leeng = Duhmi thawi neihawk/coawk cun retheih le zonzaih khal tuar ka ngam.

Mai’ tilzang cum = Mi dang cim/cei seh tiih mah riangri cim ih cei tuar .

Mangmit tok = A huatsuahdaan cu mangmit a tok/a tumdaan cu mangmit a tok. ( A huatsuahdaan cu an Bawipai’ mit hman a tok ngam ti lam khi si).

Manzuu ricin = Sun le zan ih zuuri ringring.

Maurat men uh = Tlansanin tanta men uh.

Mawlmang biakih mi bia = Zo a si ti theihliah lomi theiaw vekih bia.

Mawlmang vakih vaktawi = Tumtah nei loih vak tawi.

Melmang  man = Ningzak ter.

2.)         

   Milai nunnak bo lo, zawngsen nunnak bo lo = Minung le zawng nunnak a rak um cingcing.

Milian a duhduh in ṭong = Mi lian/mi neinung pawl cu duhduh an ṭong hluahhlo, hmaisongmi khal an nei lo.

Mindam le hurdam = Leilung Min a reh tikah rawl a ṭhat vekin nunau tlangau pasal neih tikih fa ṭha nei.

Mi ngawngtawh le mi khermei = Thusim theih lo/lungruh, thinlung khal sia.

Mi sehsawl tuk hlah = Midang har ttuanter/tuahter tuk hlah ti can.

Mi thusim le Ar hma cuk = Mi thusim mi va lun vivo cu a na aw lak men.

Mithnawm lak tak ka bang = Harsatnak tuar thluh hnuah  nomnak thlensal tikih ṭongkam.

Mi harih dar al = Mi dang an um lo ruangih mi pakhat khat tlingter/hruaitu maw thil pakhat khat ṭuanter.

Mi mut a hmangtuk = Mi phunsaih/siatnak rel a paih tuk.

Mipa hna nei = Mipa cu khawruahnak an nei cingcing.

Mi se len le tite len = Mi sia an len asile an puarthauih an hngal ce.

Mitsin cakkhai tong = Mithi : Thihhloh tong.

Mit su loih um = Mitkemza : mittling lo.

Mit le hnar kan si = Sungkhat thotho kan si.

Mual le tlangin sin nei hlah = Thil langsar/lar  tuk cu thuh theih a si lo ti can.

3.)            N

Na atawk le sentlung pawng khit aw = Na at a zual tuk aw.Na aa tuk tiin a deih nawnlo.

Na cawhcan lo, na bawce lo = Mi na bang lo/na bengvar lo.

Na ri-kuk maw na ra-kak ha ka si = Na sungte/sungkhat maw ka si.

Neta fungfek tuar = Neta bik cun co mi a nei lo.

Ngalcang in a neh a thihpi = Mai ṭong mi vekih tuah.

Ngalcar khawn le zuunrim ngaih = Ngal khawn a nat tlukin zuun ngai khal a na.

Ngawrhngeh cuahco = Natnak ruangih bese cuahco/thi zik thlang.

Ngulrua ka phum = Nehnak thantar rua ka phun.

Ning le luakin ei uh = Khawpzet le puar zetin ei uh.

Ni suah ka siar = Zunngai ruangah asilole mithi ngai ruangah nitin harsat ka tuar.

Nuhmei thu le sa zan tla = Nuhmei thu cu hmun loin a thleng aw dualdo.

Nui’ su hmu ka bang = Thil pakhat khat tuahsual/ṭong sual ruangah ṭong ding thei nawn loih um.

Nunih sing lawm = Nun laiah cun mi tampi in duhsaktu le ngainatu kan nei.

Nunau fim le Sepi ki = Nunau in thupipa le ruahnak ṭha taktak an tlin suak thei lo.

Nunharin reh ti um hlah = Neilo cingin kan ṭul mi thil pakhat khat tuah (peisa pek ṭul tivek) tikih hman mi.

Nun sung khawvang zoh = Nunhi a manhla in a sunglawi  bik.

Nupa thingthu cuhaw = Thu tenau menah nupi le pasal an toaw.

Nupi a neitui’ thu, Vokpi a neitui’ thu = Nupi cu a neitu pasal thuthu a si.

4.)            P

Patar zuri le zawng mangsia = Zianghman ah sor hmantlak lo/ṭhathnemnak nei lo.

Pat ko thelh le lengno hawh = Fala no lehpi/ngaizawn cun mi an kheuh.

Phungphai thlu lo = Dan thlun lo/Cin le daan nei lo.(Siikan nei lo).

Pialral a kai = Vanramah a kai.

Puan sung zangfil = A thuptei’ tuah mi thil.

5.)            R

Ral daih hnuih sialkip tlo = A thu cem hnuih thawhthar ciamco sal.

Ral vanphar vek a si = A awng siarsiar thluh.

Rawn ton a thaw = Rilrawnzet laiih ei mi rawl a thawbik.

Ril le ngalin = Tlin lole thei lo cingin.

Rilrawng laiṭam bangin = Rilrawng tihal zet bangin.

Ruahpi van bawng sur = Ruahpi tak zetin a sur.

6.)            S

Saar thih = Thihsia ih thi (tifen, meikang, thahmi tivek pawl).

Sakhi thingpar kaiter = Cang theilo mi cangterin.

Sakhi zankhat tla = Vei khatte lawng a ṭha thei.

Sakhi zul hra, fala zul hra = Fala cu thlun peih rero cun a ngah aw cingcing.

Sairuh dengkiak na si = Ṭongkam  na thiam tuk.

Sa lo-lam tong = Sa kap.(ramtawi pa in sa a va kap tikih ṭongkam).

Sawpsaw-lol = Thusim theihlo/sualral.

Sempawk hrinhniang = Kan pawk le kan cawilai kan fahniangpawl.

Seng-le-bang = Kham le hrap deuh.

Sialkiringcin = Ziangkim nei thluh/ti thei thluh.

Sir sik lo = Bang lo : Tluk lamlam lo.(mi pakhat khat kan bang lo mi le kan tluk lo mi parih ṭongkam).

Soi hnawm kai lo = Relsiat ding pakhat hman um lo.

Sumhmui thuam vek a si = Hnipuan ṭha hruhter man um lo.mi mit a la lo,,duh nung/iang nei thei lo.

7.)            T

Teima ekther bo lo = Hmunkip ah mi teima/mi law an rak um cingcing.

Tai ṭen cah le cah = Pacang ka tita cengmang tiih dungsip loih tuah/ṭuan tikih ṭongkam.

Taw lam van lai phir = Duhzet cingin duhlo vekih um aw ter..

Taw le lu thei lo = Nauhak tuk lai : mina bese tuk. Thinphannak ton caan le zianghman thei loih um caan. 

Temteliak hman tilo = Pumpuar nak tlak in ei ding um lo.

Thengre vuak thlak ka bang = Ṭong ngam nawn/ ṭong ding thei nawn loin ka dai ṭhepṭhep .

Thi dawk nung ngan = Thi zik tein.(mi pakhatkhat cu an soisa/an hrem nasa tuk thidot nung ngan in an tuah).

Thi hrulhhralh = Na sa zet le zuam zetin tuah/ṭuan.

Thlanhribaksen tla = Thlan dawk thluahthlo cingin.

Tlamak vek hlir an si = Mi hrawng/sa heh hlir an si tican.

Tluang fala ngai le vate zuang lai sai = Khawtluang(khawdang/hmundang) fala ngai cu vate zuang lai sai vekin ngah a har.

Turhhnawh = i ra salhsuah : mi hro phahih thil dil.

Tupa ṭha le liangdam ṭha = Tupa ṭha nei tu pu pawl cu an hlawk:Tupa ṭha neih cu hlawknak.

8.)            Ṭ

Ṭhal bangbere = Khaw Ṭhal lingsa/nisat lai tak.

Ṭhelhbawhah um seh = Hei tik/ṭul tik ih hmandingah um seh.

Ṭhuangruah sur = Fur can ih ruahsur hmaisa bik.

Ṭongkam khatin Sepi a man = Ṭong kamkhat te hi a sia a ṭha khal sisehla a hmual a na.

9.)            U

Uang-eng = Zamrang lo, nuamtete  um hnuanghno.

Uico vak khaw saruh tong = ziangtuah loin vahtawih meimei can ih thil ṭha sar/ton.

Unau hmelpalh = Thim zik zawng hrawng.

Uisa hlo bangin = Ciamciamtei’ hawl loih ti vulvo le ti kuako ih hawl/um.

Uk-o ak-o-dah = Duh cingih duh lo vekih umawter, ngawlawter.

Upa kam kau = Upa lungkim loih um/upa pawl ih kawk/nunsim.

Uite ek suak vek = Um ngaihnak thei loih tal helhhelh.

Van law cui ka thin! = Mangbang vansiat ton caan ih ṭongkam!.

Vava ka tum = Ti ngaihnak ka thei lo/um ngaih nak ka thei lo.

Vanni co lo = Vansiat tong/ hlawhtling lo.

Van lai zawlah = Van sang bikah.

Vaniim a siih sapah (bet ah,sapbet ah) a taw thu = Mi bang lo a si thlunah a damlo.

Vok suakin lungtum tong, nunau vakin zangtum tong = Vok suak asile lungtoin miin an su: Nunau a vak tamtuk asile mipa zangtum a tong.

10.)         Z

Zaang duh = Hnaṭuan duham/ham tuk (mi law).

Zaang can sawngtu  = Hnaṭuan sawngtu.

Zaang tal men a si = Mahte titheimi titham silo, zianghman lo men.

Zawhte meisa cawng vek a si = Na rei tuk lawmam.

Zawi loah a tla = Thulolakah a cang : a sungaw  lak.

Zawngih hmai hman kan zah = Minung cu zo vek te kan si khalle hmaizah ding kan rak um cingcing.

Zawngih sih hmu ka bang = Duh mi ton tikih banzai/thenzai thiam nawn lo.

Zawngin a mai tawcak a hmu loih a hawi tawcak a hnihsan = Mah sinak thei loih midang nautat ih soisel.

Zawng lakih ngau kaang = Mah tel lo/tuah lo hmansehla mi ṭha lo pawl lak um ruangih siatnak tong.

Ziangkhaw sawn lo = Ruat mi le pawi timi zianghman nei lo/Poisat nei lo.

Zim le lep ah ding hlah = Tlaknak tlangah ding hlah/thingpar sangtuk kai hlah.

Zualko zawngih rel = Miin hua sehla thinheng seh ti zawngih rel/midang thinphang seh tiih rel hluakhlo.

Zuarmar le zarmar dah = Dimtete sihmanseh, huat zawng ra reltu kawknak.

Zumaw loih tilung kaat = zum aw lo zet cingih tuah.