Sakhua timi Ṭongfang a suahdan le a sinak
Sa
Khuahlan kan pupa pawl in thilziangkim hi
a sersiamtu a um ding ti’n ruah nak an rak nei ve. Cumi sersiamtu cu ziangvek
pianhma a nei tiih an ruah dan cu, minung hmuihmel pu vek deuh, ramsa vek sitho
fawn, cuvek pianhma neimi a si ding tin an rak ruat. Cucu minung mit ih hmuh
theihlo le kutih tham theih mai khal si cuang loin thil hmuahmuah tuahtu thil
tithei ngaingai a um tiah an rak ruat ve. Cumi cu sa tiah
an rak ko ih sa ti’n an rak bia. Cuih sa cu
rannung hmangin thawinak thawn an bia. Thawinak an tuah tikah Puithaim in
hiti’n thlamcamnak ṭongfang ah a rak hmang, “sa in kan
sahrial rak co awlaw” tiin saserh peknak le thlacamnak ṭong ah an hmang. Atican
cu kan biak mi sa in kan thawiawknak rannung in rak
sang awlaw tinak a si. Cun, innsungsang harsatnak le damlo thihnak an ton
tikah sa tilungawi lo le tingol ruangih thihnak le
damlonak tonah an ruat aw ih sa ti mi an lemnak ṭongkam
ah puithiam in hitin thlacamnak ṭongkam a hmang leh. “ Kan sa a
nuar lo e, kan sa a nuar lo e, feh law feh law, suak
law, suak law suak law” tiin ṭongkam thlumte thawn innsungih um nawn loin suak
dingin a lemten an rak lem ṭheu.
Khua
Khua timi cu khuahlan kan pupa pawlin sa timi
an rak biakdaan vek thotho in ziangkim sersiamtu ah an ruat ih, khua tiin
an rak ko. Hmunkip le ramkip ih a um ruangah khua tiin
an kawhsannak bik a si. Sersiammi thil hmuahhmuah cu khua timi
ih tuahṭhehmi a siih a thil tuah mi parah le sungah amah cu a um vivo, um lonak
a neilo, hmunkip ramkip ih um, hmuhlo le theihlo khal nei loin an ruat ih a
sersiammi parah thawiawknak pein kan pupa pawl cun an va be theu. Cuiruangah,
pu pa pawl in thu an rel tinten khawzing, khawrum, khawrel, khuanui ruat,
khawsiam, khuacang tivekih an rak tinak a si. khua timi
le sa an ti mi cu sersiamtu veve si in an ruat ih an
biak dan khal a rak bang aw vivo. Cutikah sa le khua timi
cu an rak sal peh ih sakhua tiah
arak cang.
Sakhua timi an rak hawl dan cu sersiam mi
tinkim parah hawlsuak tumin an rak bia. 1. Van lam an rak bia. 2. Tifingriat le
a sungum tiang an rak bia. 3. Leihnuai thuahhra an timi tiangih ummi an rak
bia, 4. Leitlun ih sersiammi hmuahhmuah hminsak in an rak be kim thluh, bia
kimlo le salhrelh neih ding hi an phang ngaingai ih hawl thei patawpin an
hawlih an rak bia. Sakhua ti mi tilungawi lo ding hi an
ṭih bik mi a rak si.
