Ruahnak Tha Pakhat

Ruahnak Tha Pakhat

(Thuanthu tawi)

    Hlanlai ah tivapi pakhat ah Tisartam pakhat a um ti asi. Cui tisartam cu a sual ngaingai ih lawng totu minung pawl tla a deh ih an lawng khal a siatsuah theh. Hi tisartam ruangah khualtlawn an ngamlo ih ralkhat leh ralkhat sumdawnnak an tuah thei nawn lo. Khuasung mi pawl in thah an tum rero nan a fimtuk ih relh daan le a thiamtuk tikah an that ngah thei lo. Cui Tivapi thawn a hlattuk-lonak hmunah Sabek fimte pakhat a um. Cutawk hmun thotho ah cinghngia hrang ngaingai pakhat a um ve. Rannung dang pawl hmuahhmuah in a cui cinghngia cu an tih tuk ih an kua in an suak ngam lo, rawlhawl an vak ngam lo. Cinghngia ih deh ding phanah an relh ringring.

       

       Nikhat cu sabek fimte in khua a ruat thlang. Hiti a si ringring ahcun rannung tampi harsatnak an tong theh ding. ‘Cinghngia in a deh hailo hmanah rawlhawl an vak ngam lo ih rilrawng in an thi theh thotho ding. Cubet ah khi tipi sungah le tisartam tihnung ngaingai a rak um ve.. ziangtin ka tuah sehla a tha ding’ tin nasa zet in khua a ruat. Netabik ah Sabek fimte cun ruahnak pakhat a nei ngah. Tivapi kapah cun a feh ih reinawn a to. Cule tisartam in sabek cu a hmu ngaingai thlang. A hmuh veten, “ Hey, nang sabek, ziangruangah hitawk ah hnangam zet in na to? I tih lo maw si? Sabek sa hi a thlum an ti fawn, na sa le a thaw awm si. Hitawk ih to ngam cu ka rawl na si ti kha thei aw” tin deh dingin a hei pan ih a neih vivo thlang. Cule sabek in, “ ka sa thaw na ti cun na sual zo. Kei ih sa aicun cinghngia ih sa a thlum sawn ih zozo khalin an duh zet mi sa cu cinghngia sa a si. Cinghngia sa na ei dah sawm?” a ti. Cule tisartam in “ka ei dah lo, Cinghngai sa a thlum ti tla ka thei dah lo” a ti. Sabek in “zum lo in um hlah aw, na hrang sokhaw ka lo sim. Na ei duh cun na ei thei dan ding ka lo tuahsak thei” a ti. Cule tisartam in “ aw… asile ra hruai awhe” a ti.

       “A tha! Asinan, na lam in thil pakhat na thlun ve tul. Cumi cu nangmah le mah kha zanthingro vekin na um dingih na luu kha na thup ding. Cule na zaang tlun ah cinghngia ka ret dingih cutin na umnak, na ram a thlen cun na duhduh in na tuah thei thlang”a ti. Cutin tisartam khalin a lung a kim. Sabek fimte cu cinghngia hnenah a feh ngaingai thlang. Cule an tongaw ih Sabek in “ nangpa hi hitawk ah rawl thatha an um tin nuam zet in na um men, khi khatlam raal ah sa thawthaw ei ding tampi a um ti na thei lo maw? Rannung pawl an thauzet ih an sa tla a thaw zet an ti rero tla na thei lo maw?” tin a ti. Cule ei ding le deh ding lawnglawng a ruat ringring tu cinghngia cun cui thu a theih tikah a um men thei nawnlo ih feh a cak tuk thlang. Sinan tivapi khatlam kaan ding a si tikah, “ feh ka duh zet nan, ka feh theilo ding, tileuh le ka thiam silo, tivapi ka kaan thei lo ding” a ti. Cule sabek in “ a khai tivapi men cu maw na thin har? Thil harsa a silo pi, na duh cun keimah in ka lo tuahsak thei. Tisung ih thingtum (thingbel) pawl hi ka thu an ngai tuk, thu ka pek cun ka pek vekin an tuah. Tingtum parah na to dingih na feh ding simai” a ti. Cu cun cinghngia cu a phur ngaingai. An feh zik zawngah sabek fimte cun cinghngia hnenah “ ee… ka hngilh mi pakhat a um, khatlam raal ih rannung pawl cu maw an hnar a fim tukih na rim an thei ding. Na rim an theih cun na ra ti an lo thei ding. An tlan theh dingih an lo relh theh ding.  Curuangah na rim an theih theilonak dingah nataksa, na ruangpum in thil ti ka lo thuhsak ( hnihsak) theh ding. Cule na rim an thei nawn lo ding a ti. Cinhngia khal in “ aw hnih aw, a tul mi rori si” a ti ih cutin Sabek in Tur a neimi thingkung ihsin suakmi thinghnai thawn cinghngia ih ruangpumhlum in a hnih sak.

       Tivakap an thlen tikah tisartam cu thingtum vekin a um ngaingai ih cinghngia in tisartam a si ti a thei lo. Cule sabek in cinghngia hnenih a sim vekin thingtum pi hnenah thu a pek. Hitawk ah ra aw a ti.  Cui thingtumpi ih a ruahmi cun an hnenah a ra pan ngaingai. Cutin cinghngia cu thingtumpi tiih a ruahmi parah cun a to ih sabek in thu a pek sal. Ka rualpa hi khatlam raal ah rak thlen aw a ti. Cutin a feh ih tipi a lai hrawng an thlen tikah thingtumpi tiih a ruahmi cu tisartam ah a cang. Cinghngia cu a khur thlohthloh ih a tih ngaingai. Hmansehla tlan ngaihnak a um nawn lo. Tileuh le a thiam fawn lo. Luatnak ding a um nawn lo. Cutin tisartam in a deh ngaingai. Asinan, cinghngia ih ruangpum, taksa zate’n sabek in tursii a hnih theh tikah tisartam khal a thi ve.

        Ruahnak tha neitu sabek fimte ruangah sahrang ngaingai, minung le rannung tampi thinpit beidong le thinhar ter ringring tu  tisartam le cinghngia cu an thi ta. Cutawk kiangkap ih um khuasung pawl le rannung pawl in cui sabek fimte ruangah nuamzet le zalen zet in an um ih Sabek fimte hnenah an lung a awi ngaingai.